Қизиқарли ҳикоялар: 40 ёшдан кейин булган ҳомиладорлик

Марина Ким 46 ёшида ўзининг ҳайратланарли ҳомиладорлик тарихини айтиб берди.Дугоналаримга қирқ ёшдан кейин фарзандли бўлиш керак экан, дейман. Мутлақо ўзгача ҳис туясан, қалбингда хотиржамлик бўлади. Бу ёшда тушунчаларинг ўзгаради. Ҳамма ҳам 20 ёшида фарзанд неъмат эканини англайвермайди.

 

 

 

"Бу — иккинчи турмушимиз. Эримнинг биринчи оиласидан фарзанди йўқ, менинг эса 15 ёшли ўғлим бор. Учраша бошлаганимизда: «Яна фарзанд кўришни истайсанми?» деб сўраган. «Албатта!» деганман. Чунки яна она бўлишни орзу қилардим. Хаёлимдан: «Шу ёшдаям туғаманми?» деган фикр ўтган, лекин уни дарров миямдан чиқариб ташладим. Хуллас, икки катта одам учрашди ва оила қурди. Ҳаммаси мантиқан тўғри.

Бир неча ой ўтиб, ҳомиладор бўлдим. Эҳтимолий хавфни инобатга олиб, олдиндан барча таҳлилларни топшириб, текширтирдим. Ҳайз тўхтаганининг илк ҳафтасигаёқ мўъжиза юз берганини тушундим. УТТ ҳеч нимани кўрсатмаса-да, хурсанд эдим: ёлғиз эмасман, энди икки кишимиз! Бу хабардан эрим ҳам бахтиёр эди.

Ҳомиладорлик сокин ўтяпти. Сайр қиламан, йога билан шуғулланаман, витаминлар ичаман, шифокорлар тавсиясига риоя қиламан. Албатта, дармонсизлик ва инжиқлик ҳам бўлади. Бўлғуси онага жуда катта жисмоний юк тушади, руҳий хотиржамликни эса севимли инсонинг таъминлаб бериши керак. Зийраклиги ва ғамхўрлиги учун турмуш ўртоғимдан миннатдорман.

Қариндошларим биз учун хурсанд ва ҳар томонлама қўллаб туришибди.

 

 

Ўғлимга қандай айтишни билмай хавотирлангандим. Оғиз жуфтлаш учун қулай фурсат кутдим. У эса аллақачон хабардор экан: телефонимда ҳомиладорлик тақвимини кўриб қолибди.

 

 

Яъни биринчи кунлариданоқ билган, лекин индамай юрган, муғомбир.

Ёши улғайиб ҳомиладор бўлган аёлларга айрим шифокорларнинг салбий муносабати ҳақида эшитганман, аммо шахсан ўзим дуч келмадим. Аёллар маслаҳатхонасида очиқюз билан кутиб олишди. «Ўзим иккинчи фарзандимни 38 ёшимда туққанман», дея кулиб қўйди гинеколог. Аммо участка шифокори таваккал қилаётганимни айтди. Салбий фикрларга умуман қулоқ солмайман.

 

Агар мендан қайси ҳомиладорлигингни қайтадан ўтказишни истардинг, деб сўрашса, ҳеч ўйланмасдан, иккинчисини, дейман. Катта фарзандимда ҳадик бўлган. Ҳозир эса хотиржамман, ҳар кунимдан баҳра оляпман. Ажиб туйғулар оғушидаман!".